2023年第1個挑戰是：「考車牌」！
考車牌一直都是我的bucket list item之一，有點後悔大學的時候沒有考，學費應該可以便宜不少ㅠㅠ 隨著年紀漸長，越來越感受到有車的好處—至少可以載著家人、狗狗們四處外出，減少舟車勞頓，而且可以製造更多回憶。雖然在香港未必會買車，但有了車牌的話，偶爾出國自駕遊也很方便，所以今年年年初就趕緊開始了這個考車牌challenge！
甚麼是JFDI企劃/JFDI Project？
JFDI企劃是一個自我成長企劃。
—JFDI全寫是“Just FUCKING Do It“。對，就是這樣簡單粗暴的名字！
這個計劃其實在我腦海裏已經有一段很長的時間，但礙於本人是重度拖延症+過度計劃型患者，一直遲遲未有履行。自從2022年看完《我的出走日記》之後，受到了很大的啟發，很想像美貞一樣找到自己的解放方法—「我做了從未試過的事之後就會蛻變了。」
嗯…所以為了要增加自己的行動力，所以就開始了這樣的一個Project。與其慢慢計劃要怎樣做，不如先FUCKING Do It，想太多、計劃太多最後反而因為時間拖長而磨滅意志！
JFDI企劃的意義在於行動，結果成功與否，至少你也踏出了一步去改變現狀，那麼今天的你對比起昨日的你就有所不同。我希望透過JFDI Project把這些想法和目標一一實踐和記錄，希望將來回顧的時候可以看到自己的變化！如果你也希望改變，不妨考慮開始屬於你自己的JFDI企劃！
| 項目 | 考車牌 |
| 日期 | 2023至2024年 |
| 費用 | 合計總費用：HKD$28,638
|
做了大概1個月資料搜集，最後還是決定直接向駕院報名，詳細原因可以參考：《香港學車考車牌流程心得全紀錄》。
報鴐院其實真的好肉赤💸 一下子就燒了萬幾蚊orz 希望真的可以1 take pass… (10個朋友大概9個都做不到…🥶) (PS: 我還是考棍波的orz)
不過即使今年報名考車牌，也不是今年內可以完成所有考試…年初報完名後大約1個多月後就可以考筆試：一如傳聞所說只要有溫書，合格其實不難 (2022年全港的筆試合格率超過83%！)。
考之前其實有點緊張，始終離開學校已經一段時間，好久沒有進入溫書的狀態，加上自己不是愛車之人，對於交通方面的知識完全是有限公司，所以都驚自己會fail😅 幸好最後也pass！
(PS: 如果你也在準備筆試，不妨參考一下這篇車牌筆試心得，寫了一點必溫部份！)
我自己覺得先做MC練習再針對不熟悉的地方再集中溫是比較有效率的！
至於駕院的筆試精讀班我都建議要上，特別是像我這些不熟車的人，至少上完會知道有什麼部份容易錯/一定會考！筆試精讀班建議考前2星期上，學完concept再溫會比較好！
考筆試的過程其實很快，正常人應該不會用完20分鐘，快的話5分鐘內都可以完成！
因為我是跟駕院報名，所以考完大約30分鐘後就收到合格訊息🎊 如果自己報名的話，就要在考場外等大約20分鐘等櫃台叫名先知成績。
香港駕駛學院理論課一定要上？理論課有無用？
我諗呢個問題好多報駕院嘅同學仔都想問—上網睇討論區，我諗10個有9個都叫你唔洗嘥時間上。唔知出呢啲建議嘅人係咪本身已經對車有一定認識，但我就一定唔係，所以你問我的話我係一定會建議大家上埋佢—第一，你都比咗錢，個package包埋點解唔上？第二，無基礎嘅人如我自己，上完at least會get到啲concept！同埋駕院教得嘅都係啱考試標準嘅方法，所以我點都覺得上咗係好啲。反正呢啲堂你又唔轉得做實習堂~ 都比咗錢點解唔聽埋？
香港駕駛學院基礎訓練流程分享
考完筆試事隔幾個月，終於可以update一下進度。其實我開始得有啲遲🤫 建議大家考前4個月開始主動搵師傅約時間。其實我自己覺得駕院約時間都幾kick…唔知係咪得我個師傅係咁—大約3個月前打嚟問我平日得唔得，本身我諗住一次過睇晒自己咩時間OK再whatsapp覆佢啦，但係師傅又話佢唔睇whatsapp有咩要打電話同佢講…最後佢係一次過自己喺系統mark時間…咁都明嘅，佢一次過要編咁多個又要就時間，但係我覺得個流程可以改善一下，我自己就唔想煩，就到就盡量就。btw唔好以為19堂好多，每次連堂上的話，其實得8堂到…仲要最少預3-4個連堂練好基本功先可以再揸出街練車…所以如果你想練多啲的話，記住預少少時間比自己補堂！
下面係我個學車flow記錄：
預約申請學牌
記得約師傅學車前要申請咗學牌先！叫駕院整要6個禮拜，所以我如果你想快啲整到就自己整啦！
我自己都衰嘅，唔記得咗整學牌，好遲先整到所以都遲咗開始學。我係上運輸處個網自己預約。如果你都打算自己整學牌，記得早2-3星期預約，因為無得約近幾日嘅booking。預約完可以早/遲1個鐘上去整。拎齊填好嘅表、身份證、住址證明去櫃台，職員收完表格之後就會叫你等叫名比錢—我平日大約2、3點去，30分鐘左右就搞掂晒，即日拎到學牌！
駕院考車牌—理論課(1)：基礎訓練
學車前記得要上咗基礎訓練先！基礎訓練即係傳說中嘅睇片學車嗰堂！網上勁多人話呢堂好廢，但係對於我呢種完全無揸過車又無研究過點開車停車嘅人嚟講我自己覺得係有少少用！(利申：我仲要係考棍van😅 老實講睇完啲片一次都唔係好記得，同埋第一次學有少少手忙腳亂！) 呢堂自動波同棍波會一齊上，學員會有個模擬司機座位可以由安全帶、調較座位、吊極力子、踩油門、剎車、轉燈、扭軚、拉手制、熄匙等等都可以跟住指示做，然後就會跟住實際街景影片跟住練。美中不足係影片只係影片，唔係大家想像中嘅VR，影片係唔會跟住自己練習嘅方向郁🤣 呢個亦係最多人話無用嘅原因。再次重申，我覺得係有用！！！！！如果你同我一樣無咩底，呢堂唔好skip，at least你上實習前知道少少基本先學會好啲！
課堂完之前會有個測驗，個模擬座位系統可以記錄到你嘅動作，然後會出返份report話比你錯咗幾多%。
駕院考車牌—實習課後記
第一次上堂要去CS登記返學牌資料先，職員會叫你一次過book埋模擬考試同獨立訓練嘅時間。佢咃建議考前一星期上堂，如果之後要改要親身到學校改，唔可以電話改。
搞完手續之後就坐陣梳化等夠鐘師傅搵你上堂。師傅夠鐘會打嚟搵你。
第一堂：練踩極力子/腳掣、練軚感
第一堂本身唔expect太多因為始終要摸熟架車先可以練到其他技巧。我諗師傅都用咗成半個鐘以上講理論，其實我有少少想快啲練…因為講到尾都係揸車都係最重要臨場反應同安全意識。扣除呢半個鐘，實際其實練得1個鐘鬆啲…主要係圍住個場兜圈練，同埋要學睇鏡同盲點/轉線，我諗我兜咗5-6圈左右就完…
第二堂：停車拉手制、斜路開停車、S型泊車
第二堂嚟講，因為時間隔得比較耐，師傅都唔記得教咗啲咩，所以又repeat咗少少第一堂嘅嘢。今堂有試吓自己踩油門。雖然話就話學咗斜路開停車、S型泊車但係都係嗰句，場內比較多車要排隊，加上師傅上堂期間又講咗陣電話，但係又無補返啲時間比我，搞到我無得練…
第三堂：S型泊車、窄路調頭
第三堂依舊喺場內打轉。雖然係平日下午，但係都比想像中多車…所以其實練得唔係好多，都用咗好多時間等。我諗大概練咗3-4次泊車+窄路調頭到？斜路開停車無再特別練…今堂因為多車所以overall車速都好慢…
第四堂：S型泊車、窄路調頭、出街
本身無expect今堂出街，因為我都覺得自己進度幾慢，仲以為未出到街😂 每上新一堂都覺得進度突然快好多…有d速成班嘅感覺。其實我上堂都仲係對極力子、腳掣控制唔係好熟…不過今日坐上車個感覺好似又好咗啲，唔知係咪上堂多車所以開停車多咗，所以今堂轉波檔同踩極力子、腳掣好似順咗啲。
今日好快喺場內練咗一次S型泊車+窄路調頭，師傅就叫我出街啦… 老實講仲係好唔熟，我諗可能要補鐘練一練。第一次出街真係好緊張，突然之間好多嘢要兼顧…睇燈、轉線、睇行人、轉波…師傅話要放膽少少揸快啲…出街真係好唔同，車速真係快好多，所以都驚驚地…成日驚有人衝出嚟😂 同埋前面多學神朋友仔，都同我一樣唔敢行太快，所以我都跟住就住就住…出街好難，但係幾好玩！同場內個感覺好唔同，不過好手忙腳亂係真嘅，因為唔熟路又未轉過波…下堂繼續努力！
第五堂：長途駕駛
我發覺每堂啲進度都突然去得好快😅 第2堂出街突然間就話出長途。今堂完全無喺場內練，一上車就出街了。不過我覺得好似真係開始越揸越順，係軚盤控制要再好啲，成日側埋一邊…然後今日亦都挑戰咗迴旋處，好多車好恐怖😂 我覺得迴旋處最緊要要去得順，唔好放慢窒吓窒吓…
師傅今堂教長途嘅原因係想我練轉波，一轉二，二轉三再轉返落二…沙田啲路其實都幾多燈位，所以其實好快就要轉波…第2次轉咁多波有啲手忙腳亂，但係我覺得出完街之後開停車入波好似快咗…中後段師傅已經無提我轉燈入波我就自己入！車速控制要再好少少，都係容易比人cut入嚟…同埋今日遇到個阿叔行馬路阻住晒，一出馬路真係好多突發嘢所以我覺得真係要練多啲，不過唔係死記條路邊到有死車，而係要學識有臨場反應！
*第五堂之後，我覺得進度比較慢，所以有再出去搵補鐘師傅補一補路試。老實講，其實棍波貨Van嚟講，駕院嘅堂數真係好唔足…因為棍Van學操控極力子已經要啲時間，基本上唔多時間出街練…練得街嚟又無時間練泊車調頭，所以建議大家上到咁上下如果覺得唔夠時間就搵定街外師傅！不過大部份都會要求你出過街先可以學—所以你一上完第一堂出街課程就好問補鐘師傅嘅期。
街外補鐘#1
首先一上堂已經有少少唔慣，因為唔同貨Van嘅軚盤、手掣鬆緊已經好唔同。加上又未熟點吊好極力子，補鐘第一堂師傅已經開始執我控制極力子嘅問題—which is我原本駕院阿sir無講到咁仔細，同埋無特別講我呢啲問題。
第六堂：路試路線練習
今堂主要都係練返路試路線，但係師傅無特別講解路試注意事項，全程就聽佢指示跟住做。學院第三次出街轉波仲係好手忙腳亂。
街外補鐘#2
同上堂大同小異，都係主力練路試。街鐘師傅同本身我駕院阿Sir最大分別就係街鐘師傅會提多啲去到咩位有機會轉燈要減定速。轉波仲未係好熟，要師傅主動提。同埋師傅再執咗一執我停車開車極力子嘅問題，教我點樣可以唔好chok！
第七堂：路試路線練習
基本上大同小異，今堂都係練路試路線。不過今堂師傅先正式講邊條線打邊條線。上堂仲係好依賴師傅指示。
街外補鐘#3+#4
都係練路試，師傅知我乙部無信心，所以有抽時間同我練極力子控制車速🙏
駕院特惠補鐘 #1
駕院有分2種補鐘—跟返自己導師補就正價HKD$1,280/2節；random導師特惠補鐘HKD$780/2節。(2024年基準)
呢堂都係好臨時book，因為本身我早幾個星期前問，駕院話所有補鐘都full晒。因為啲導師間唔時會放時間出嚟，所以久唔久要自己主動去counter問。我後尾都有打電話問，之後佢哋可能有record，所以有位都有打嚟話我知。駕院嘅補鐘有分場內同場外練習，唔係你book到就可以練路試，所以我個人建議路試都係補街鐘好啲！At least時間多啲彈性！
我本身其實想book多幾節獨立訓練練泊車調頭，但係獨立訓練真係超級full，如果你真係想加建議早3-4個月book定。我個人會比較prefer特惠補鐘練泊車調頭多過獨立訓練，因為有導師即時指正會好過你自己慢慢摸！下面會再講吓獨立訓練嘅模式同問題。
講返特惠補鐘呢堂，我book嘅時段係只可以場內學習。一上車已經同阿Sir講我想練泊車調頭，佢就叫我去考試位練吓，又去練習位練吓。全堂真係100%練泊車調頭+2次斜路開停車，不過因為我泊車對位拉直車真係唔係幾好，所以花咗好多時間練泊車，調頭反而無咩練。幾幸運呢個補鐘阿Sir幾好人，同埋好有耐性提我去到咩位要轉。本身我跟嘅師傅無提嘅位都會提埋，亦都會鼓勵我自己落車睇吓啲位啱唔啱，所以都感謝佢嘅提點。🙏
第八堂：場內練習—S型泊車、窄路調頭、斜路開停車
其實呢堂已經隔得有少少耐，好彩中間有補街鐘，所以無咁生疏。唔知阿Sir係一早預呢堂場內練定係聽完我話乙部唔熟先安排全堂場內練習，不過正合我意，因為路試我可以補鐘練。不過唔知佢係咪expect呢堂係比我當考試咁練所以全堂都無提點我…even我扭錯軚都由我…上完呢堂感覺上仲無信心咗=_= 不過我自己都唔好嘅，因為未記熟方法…
第九堂：獨立訓練+模擬考試
呢2堂唔係用平時上堂用嘅車，亦都唔係平時跟開嘅導師同我上。
講咗獨立訓練先！獨立訓練只有1節45分鐘，你要提早少少去獨立訓練area等，然後會有個阿Sir安排你去邊架車。同時段只會有3個練習位，個位係劃死的。上車前佢會建議你頭20分鐘練好泊位先，不過我見同時間其他2個學生都無跟足…
如果你同我一樣，扭軚轉入泊位再倒後個timing成日捉唔準的話，獨立訓練其實唔係好練到，因為無機會比你練轉彎入去。同埋你完成full set泊車+調頭之後，要再做多set調頭先可以再練過泊車。因為第二次調頭睇個位同平時睇開嘅唔同，所以呢度又會浪費咗啲時間-.- (當然如果你好叻就唔會有我呢個情況😅) 同埋我想講獨立訓練嘅車狀態明顯係差好多😅 個極力子嘅摩擦點、軚盤、手掣手感同上堂/補鐘嘅車好唔同…
基本上我嘅經驗嚟講，個當值阿Sir係完全無理過我，全程就算你做錯咗都係自己去摸索，無人會提你。That’s why我覺得如果你真係想練泊車調頭的話，最好都係跟返導師！
上完獨立訓練之後接住落就係模擬考試，模擬考官係駕院師傅嚟嘅，夠鐘佢會嚟reception叫名搵你，之後就會上車出街。模擬考試係唔會考泊車、調頭同斜路開停車。我個模擬考官都幾好人，感覺好nice，所以無咁緊張。考緊嘅時候佢都有出聲提少少我有咩問題，事後又會同我坐底review返。🙏
不過我想講真係好confused，好似唔同阿Sir對於唔同細位都有唔同意見… 淨係要唔要望倒後鏡都已經個個標準唔同… 一啲話要一啲又話唔洗… (我最後考係無睇，因為平時無睇所以無呢個習慣，臨考都好難即刻改到…) 所以有時跟得多師傅都唔知係好事定壞事 🙃
街外補鐘#5+#6
因為考之前已經無晒駕院連堂，所以考前連續2日再練路試加強信心！另外再叫師傅示範咗牛皮沙線，感謝師傅好好人比我錄影參考！
第九堂：場內最後練習—S型泊車、窄路調頭、斜路開停車
最後1堂只有1節，安排咗喺考試前嘅時段。因為得45分鐘，所以無出到街，直接場內練。對於我嚟講其實仲好，因為我對乙部真係無咩信心，最後沖刺練習幾好！臨考前轉入泊車位嘅位置都係做得唔太好，方法已經記得晒，係車速要再控制得慢啲，等自己夠時間做！
—
乙部+丙部考試
去完報到室報到就等叫車No.上車，我個考官感覺上好嚴肅，所以我全程都好緊張😅 考試嘅時候考官會random叫你出街先/考泊車調頭先。我就先考乙部…超級緊張因為我最唔熟，但係好彩考試嘅時候吊極力子好咗，最後都pass！🥹
唔知叫好彩定唔好彩，丙部抽到條最短嘅路線，唔好彩係抽到無得練嘅牛皮沙線。錯咩就唔講了，但係我係喺牛皮沙停車場度有嚴重失誤…😑
umm 我會話今次丙部肥係自己問題嘅，錯得比較多係駕駛意識同臨場判斷+反應，呢啲真係好靠練習同運氣。
不過我真係覺得跟個啱自己又細心嘅師傅好重要。如果當初我無出去再補鐘執返啲細位的話，應該會有更多駕駛上嘅錯誤。我自己就覺得我個固定駕院阿Sir感覺上唔係好執我啲細位，好多時錯咗都唔會主動講返問題係邊，或者應該點做… 可能淨係講句考試唔可以咁就完…=_= 我自己都有責任要追問嘅… 加上佢上堂唔係好專心，間唔時會睇/講電話，所以miss晒我啲細位都唔出奇。同埋我想講佢完全無帶過我去牛皮沙線(禁學區域)，淨係口頭講過… 但係大家有學車都會知，口頭講係唔會明-.- 而我考試咁啱就係抽中牛皮沙線，好彩我有睇片+補鐘阿Sir有帶我行過😅 街鐘師傅就好唔同，佢真係全程睇住我點做，做錯又會即刻提，我覺得咁樣有用好多嘅。跟邊個阿Sir都有人會pass/肥，所以我唔評論邊個好定唔好啦… 我自己就覺得作為零路面經驗嘅BB班同補鐘阿Sir夾啲，可能本身熟車/有揸車concept嘅跟我駕院阿Sir就無咩大問題掛。
忠告：如果大家覺得自己駕院阿Sir同自己唔夾的話，上完第1堂好轉導師了。我第3堂想轉都已經太遲，因為堂數少又近考試，好多阿Sir都已經full晒，就算你問完人邊個師傅好想轉都唔會轉到…
—
肥咗之後可以跟駕院再排快期考，但係要跟駕院再補7節鐘，重考費HKD$6,600 (2024年基準；包租車、7節補堂、考試報名費)。我再問多少少資料，大家可以參考一下：
- 沙田駕院考試路線只係駕院考生先可以考，所以如果你重考想考返沙田，就一定要跟駕院報
- 宜家所有快期都係抽籤，駕院都保證唔到等幾耐先有得考
- 駕院重考補堂好大機會唔係跟返自己原本導師，亦都唔可以要求指定導師，你要預咗每堂都用唔同車+唔同導師
- 如果你想跟固定導師，就要排尾期
- 快期補堂時間一定要自己就導師，你無得揀
- 考試租車係random派，每堂都用唔同車練，考之前未必可以比你試到揸，除非你排到重考前有堂
綜合返以上幾點，我自己覺得以棍Van嚟講太多變數 (練習+考試車好重要)，加上時間好唔flexible，所以我最後揀咗自己排快期重考。不過乙部跟駕院考係好嘅！
肥佬事隔唔夠一個月我又嚟update啦！重考第二次棍Van終於pass咗！🎉
十分好彩！肥佬4日後就決定自己抽快期，抽唔夠幾日就抽中咗！系統會比你揀時段，一般嚟講朝早都會穩陣啲！之後佢就會比你揀日期，日子大概係2-3星期後。有得揀當然揀最後嗰日，多啲時間練嘛！
因為我無整智方便，所以揀完快期日子就即日去運輸處比錢確定快期同考試時間+試場。我就好好彩抽到白雲(即係以前嘅澤安)！應該係全部路線最易考嘅一條！白雲淨係Van仔重考先會抽到！今次無論時間定考試路線都抽得好好，已經係距離成功近少少！Lucky！
一知道考線之後我就即刻PM返我個補鐘師傅，睇吓佢有無位收我~ 好好彩佢肯收返我，咁我就專心跟佢練，唔洗問嚟問去！師傅收完我就即刻幫我排schedule！我個師傅超好，每堂收費，又唔會提早收考試租車費，唔啱隨時可以轉。我覺得呢個係個師傅對自己信心嘅證明嚟。其實宜家好多教車師傅都唔憂做，因為求大於供，如果個師傅對自己教學有信心的話，其實佢哋唔會怕個學生走而一早收足咁多堂錢/租車錢。大家可以用呢樣嘢嚟作為搵師傅嘅參考！
講返重考部份先—我考之前一共上咗6.5堂。我個case算好，因為我由抽到去到考期都差唔多2個幾禮拜，星期六日盡量上足堂，然後平日再請假抽時間練。考前一日同埋考前1個鐘都有練，我覺得幾有用，可以幫自己keep住個感覺同埋warm up吓。考街場唯一唔好處就係無得練出入試場，聽師傅講好多人肥入試場個位，因為扭完入閘口無回軚，所以就肥咗接近物體。雖然我都扭得唔好，基本上踩晒界，我自己諗住寧願踩界都唔好撞閘😂 關於出入白雲試場嘅部份，建議大家可以睇吓輝Sir條片—佢趁試場開幕嗰陣拍咗片示範大窩坪同大埔道2條線點樣轉入試場！
話說好神奇，我考嘅時候都覺得考官好熟口熟面，後尾睇返先知原來同第一次考係同一個lol
基本上個流程同上次都差唔多，首先去試場報到先，之後佢會叫你拎2個駕駛考試嘅牌比師傅掛喺車。本來我以為上車ready好之後夠鐘就會考，點知我坐好之後考官就上車話開始考試，嚇到我個心離一離😂 仲諗住抖返5-10分鐘冷靜吓…不過都好嘅我都想快啲考完！
師傅好好人幫我將架車泊喺第一個車位對正門口，等我唔洗扭咁多軚，直出扭軚就係。一開車考官就話轉左，即係考大埔道！整體嚟講都正常發揮，加上考之前有練過，所以個人都已經warm up好。考嘅時候係平日朝早，所以人流少啲，死車都唔多，整體都好smooth，揸得好得心應手，唯一騰雞位就係出入試場個位，因為真係無練過~ 好彩入試場踩界唔會肥lol 考完入返試場之後要將架車停喺指定空間，唔洗特登泊直架車。安全考完就去返報到位等成績。試場姨姨好快就出嚟恭喜我pass咗💙
睇返份成績表，基本上今次有剔嘅上次都有，但係明顯就少咗好多細剔，所以即係有進步~哈哈！❤ 白雲嚟講熱門考線係大埔道。白雲路線唔難考，因為一嚟無禁學路，二嚟得2條路線，唔多轉線，所以好易記。白雲街考核重點好著重睇鏡轉線嘅部份，加上多斜路同埋都多行人橫過馬路，極力子控制都要好先唔會飆前/溜後。行人絕對係比沙田多，所以要小心啲人喺車與車之間走出嚟，一唔對路就停車唔好再比架車太接近行人！
如果你問我，我覺得沙田同白雲其實都幾好考！沙田其實路況無咁繁忙，只要你練得夠，意識做得好，其實1 take pass係唔難。雖然我第一次肥咗，但係練耐咗就知當初係因為隻腳踩極力子同腳掣控制得未夠好，所以先會有失誤。明顯第二次考白雲練多差唔多5個鐘之後已經進步咗，少咗好多剔！開心！！❤
上網搵白雲街資料唔多，因為好多駕院/YouTube師傅都好懶無更新到個名，其實睇返2024年學車王最新嗰2條澤安片就OK！白雲考場好處係佢得2條路線，無沙田咁煩要記6條…一堂基本上閒閒地每條路線都練到2次！其實咁樣計返2次考試總共練咗28小時多啲，同運輸處建議嘅30小時差唔多。所以我覺得30小時其實真係幾基本，如果考前有時間真係練多啲，唔好嫌貴唔加操。真係practice makes perfect！第一堂嘅我連極力子都未控制得好，練夠28個鐘之後真係smooth咗好多！唔敢話已經好叻，但至少轉波停車唔會chok！
總結嚟講，好師傅+好考官+好路線+好時間+好天氣+勤力=合格！
如果大家想問師傅資料再私下facebook PM我啦…！🥴
